விஷாலின் காதலி யார்? பத்திரிகைகளின் பட்டிமன்றம்
- 09.02.2008
By Amalan
விஷாலின் காதலி ப்ரியாமணியா, நயன்தாராவா? என்ற நாட்டுக்கு தேவையான 'நற்செய்தியை' வாரி வழங்கிக்கொண்டிருக்கின்றன தமிழ்நாட்டு பத்திரிகைகள்.
|
|
|
காதலர் தினத்தையொட்டி வார இதழ் ஒன்றுக்கு பேட்டிக்கொடுத்திருந்த விஷால், காதல் பற்றி இப்படி கூறியிருந்தார்... "என்னையும் அறியாமலேயே ஒரு நடிகை என் மனசுக்குள் நுழைந்துவிட்டார். அவர் அனைவரும் அறிந்த ஒரு நடிகை. அவரது எளிமையும், எதையும் துணிவாக பேசும் குணமும் என்னை கவர்ந்துவிட்டது. அவருக்கு என்னை பிடிக்கும். ஆனால் இதுவரை எனது காதலை அவரிடம் வெளிப்படுத்தவில்லை. என் காதலை சொல்லாமலேயே போகும் வாய்ப்பும் உண்டு."
விஷாலின் இந்த பேட்டி நேற்றைய, இன்றைய தினசரிகளுக்கு சரியான தீனி போட்டுவிட்டது. தமிழ் முரசு, மாலைமலர், தினகரன், தினத்தந்தி, ஆகியவற்றில் மாறி மாறி செய்திகள் வெளியிடப்பட்டுள்ளது.
விஷாலும் - ப்ரியாமணியும் 'மலைக்கோட்டை' படத்தில் சேர்ந்து நடித்ததால், பத்திரிகைகளின் கணிப்பு ப்ரியாமணியை குறிவைக்க, மாலை நாளிதழ் இரண்டில் ப்ரியாமணியுடன் விஷால் காதல் என்ற தனது கற்பனை செய்தியை கசியவிட்டது. வேறொரு பத்திரிகை தற்போது 'சத்யம்' படத்தில் விஷாலுக்கு ஜோடியாக நடிக்கும் நயன்தாராதான் விஷாலின் காதலி என யுகித்திருந்தது.
இந்த பரபரப்பை இன்னும் பாப்புலராக்க முடிவு செய்த விஷால்தரப்பு 'நான் காதலிப்பதாக சொன்னது ப்ரியாமணியை இல்லை. அவர் ஒரு இந்தி நடிகை' என நாட்டுக்கு தேவையான விளக்கத்தை தர, அதற்கும் கால் பக்கம் ஒதுக்கி இன்றை நாளிதழ் ஒன்று செய்தி வெளியிட்டுள்ளது. 'நானும் விஷாலும் நண்பர்கள் மட்டுமே' என பிரியாமணியின் மறுப்பு இன்னொரு பக்கம் இருக்க குழம்பி போனர்கள் வாசகர்கள்.
பரபரப்புக்காக இல்லாத செய்தியை கிளப்பிவிடுவது என்பது பத்திரிகைகளுக்கும் சில நடிகர், நடிகைகளுக்கும் உப தொழிலாகிவிட்டதை யார் கேட்க முடியும்?
|
