ஹாலிவுட் நடிகர் புரூஸ் வில்லிஸை புகழின் உச்சியில் உட்கார வைத்த படம் 'டை ஹார்டு.' 1988-ம் ஆண்டு 28 மில்லியன் டாலர்களில் உருவான இப்படம் உலகம் முழுவதும் 187 மில்லியன் டாலர்களை குவித்தது. ஒரு கட்டிடத்தினுள் பிணைக்கைதிகளாக இருப்பவர்களை விடுவிக்கும் புரூஸ் வில்லிசின் சாகசம் ரசிகர்களை பெரிதும் கவர்ந்தது. இந்தப் படத்தில் இவர் ஏற்று நடித்த ஜான் மெக்கினளன் போலீஸ் அதிகாரி வேடம் புரூஸ் வில்லிஸ் பெயர் அளவுக்கு ரசிகர்கள் மனதில் பதிந்து போனது.
இந்தப் படத்தின் வெற்றியை தொடர்ந்து 1990-ம் ஆண்டு டை ஹார்டின் இரண்டாம் பாகம் வெளியானது. அதுவும் சூப்பர் ஹிட். பிறகு வெளியான மூன்றாவது பாகம் 'டை ஹார்டு, வித் ஏ வென்ஜியன்ஸ்' படமும் மிகப் பெரிய வெற்றியை ஈட்டியது. ரகசிய உளவாளி 007 அளவுக்கு ஜான் மெக்கினளன் கதாபாத்திரமும் ரசிகர்கள் மனதில் பதிந்து போனது.
ஹீரோவாக கோலோச்சிக் கொண்டிருந்த புரூஸ் வில்லிஸ் திடீரென துக்கடா கேரக்டர்களிலும் நடிக்க ஆரம்பித்தார். இது அவரது ஸ்டார் இமேஜை பாதிக்கும் என்பதுடன் வார்னர் பிரதர்ஸ் போன்ற மிகப்பெரிய ஸ்டுடியோக்களின் படங்களில் நடிப்பதற்கான வாய்ப்பையும் பலவீனப்படுத்தும் என அவரது நலம் விரும்பிகள் எச்சரித்தனர்.
இவை எதையும் காதில் வாங்கவில்லை புரூஸ் வில்லிஸ். மாறாக சின்ன ரோல்களில் விரும்பி நடித்தார். ஹாலி பெர்ரி நடித்த 'பெர்பெக்ட் ஸ்ட்ரேஞ்சர்' படத்திலும் சிறிய ரோலில் தோன்றினார் புரூஸ். இதற்கு அவர் சொன்ன விளக்கம், "ஹாலிவுட்டில் சின்ன வேடம் பெரிய வேடம் என்று எதுவும் இல்லை. சின்ன நடிகர் பெரிய நடிகர் என்றுதான் இருக்கிறார்கள்."
புரூஸின் வார்த்தைகள் நிஜம். அவரை வைத்து பலநூறு மில்லியன்கள் செலவழித்து 'டை ஹார்டு' படத்தின் நான்காவது பாகத்தை தயாரித்துள்ளனர். ஆக்ஷ்ன், பிரமாண்டம், கிராபிக்ஸ் என பல விஷயங்கள் இருந்தாலும் ரசிகர்கள் இப்படத்தில் ஆவலுடன் எதிர்பார்ப்பது, அசராமல் அதிரடி நிகழ்த்தும் ஜான் மெக்கினளனை!
இம்மாத இறுதியில் இப்படம் தமிழிலும் ரிலீஸாகிறது. மெக்கினளனை சந்திக்க நீங்களும் தயார்தானே?
|
