ரவியும் அவரது அண்ணன் ராஜா இருவரும் அறிமுகமானது ஒரே படம், 'ஜெயம்'. அறிமுகங்களான இவர்களின் இந்தப் படம் பெரிய வெற்றியை பெற்றது. இதனைத் தொடர்ந்து இந்த அண்ணன், தம்பி காம்பினேஷன் 'எம்.குமரன் சன் ஆப் மகாலட்சுமி', 'உனக்கும் எனக்கும்', 'சந்தோஷ் சுப்ரமணியம்' ஆகிய படங்களில் இணைந்து பணியாற்றியது.
ஆச்சரியமாக இவர்கள் இணைந்து பணியாற்றிய அனைத்து படங்களுமே மிகப்பெரிய வெற்றியை பெற்றது. அண்ணன் இயக்கத்தில் நடித்த ரவியின் படங்கள் மட்டுமே வெற்றி பெற்றது இன்னொரு ஆச்சரியம்.
ஆனால், ஊர் சும்மா இருக்குமா, நான்கு படங்களுமே ரீ-மேக். அதனால்தான் வெற்றி பெற்றது என இருவரின் உழைப்பையும் குறைத்து மதிப்பிட்டது. முக்கியமாக ராஜாவுக்கு ரீ-மேக் ராஜா என்ற பெயரையும் அளித்தது.
இதில் கடுப்பான ராஜா அடுத்து நேரடி படத்தை இயக்கப் போவதாக அறிவி்த்தார். 'ஜப் வி மெட்' படத்தை தமிழில் இயக்க வந்த வாய்ப்பையும் இதன் காரணமாக மறுத்தவர். தெலுங்கு படமொன்றை இயக்கும் வேலையில் மும்முரமாக உள்ளார். நேரடிப் படமான இதில் பிரபாஸ் நடிக்கயிருப்பதாக தகவல்கள் தெரிவிக்கின்றன.
எப்படியோ தனது சபதத்தை நிறைவேற்றுவதில் உறுதியாக இருக்கிறார் ராஜா.
|
