முகத்தை மாற்றி ஒட்டினார்கள் என்று மூன்றுகோடி நஷ்டஈடு கேட்டு வக்கீல் நோட்டீஸ் அனுப்பினார் குஷ்பு. பதினாலு வருஷத்தில் ஆயிரம்கோடி வரை அபேஸ் செய்துவிட்டது என்று சன் டி.வி.க்கு 2000 கோடி நஷ்டஈடு கேட்டு வக்கீல் நோட்டீஸ் அனுப்பப்போவதாக அறிக்கை வெளியிட்டனர் தயாரிப்பாளர்கள். அறிக்கைதானே வெளியிட்டீர்கள், இந்தா பிடித்துக்கொள்ளுங்கள் வக்கீல் நோட்டீஸ் என்று பதிலடி கொடுத்திருக்கிறது சன் டி.வி. நிறுவனம்.
இந்தியாவில் ஒளிபரப்ப அனுமதி வாங்கி உலகம் முழுவதும் படங்களின் பாடல்கள், கிளிப்பிங்ஸ்களை ஒளிபரப்புகிறது சன் டி.வி. நிறுவனம் என்பது தயாரிப்பாளர்கள் தரப்பின் முக்கிய குற்றச்சாட்டு. சன் டி.வி.க்கு என்று உரிமை வாங்கி சன் மியூசிக், கே டி.வி., சன் நியூஸ் என அதன் குடும்ப உறுப்பினர்களிலும் படங்களை, அதன் பாடல்களை போட்டு உரிமை மீறுகிறது சன் டி.வி. என்பது இன்னொரு குற்றச்சாட்டு.
இரண்டையும் வன்மையாக மறுத்திருக்கிறது சன் டி.வி. நிறுவனம். மேலும், படங்களை பிரபலப்படுத்த தயாரிப்பாளர்கள் சன் டி.வி.யை தேடி வருகிறார்களே தவிர, ஒப்பந்தம் எதையும் நாங்கள் மீறவில்லை என்றும் தெரிவித்துள்ளனர்.
பதினான்கு ஆண்டுகளாக வாய்மூடி இருந்த தயாரிப்பாளர்கள் இப்போது அவதூறு அறிக்கை வெளியிட்டது உள்நோக்கம் கொண்டது. ஆகவே, சம்பந்தப்பட்ட தயாரிப்பாளர்கள் மீது மானநஷ்ட வழக்கு தொடரப்படும் என்று அறிக்கையில் பெயர் வந்த தயாரிப்பாளர்கள் அனைவருக்கும் வக்கீல் நோட்டீஸ் அனுப்பியிருக்கிறது சன் டி.வி. நிறுவனம்.
இதில் காமெடி, தயாரிப்பாளர்களின் அறிக்கையை வெளியிட்ட பத்திரிகைகள் மீதும் வழக்கு தொடரப்போகிறதாம் சன் டி.வி. நிர்வாகம். அறிக்கையிலுள்ள விஷயங்கள் உண்மையா என்று ஆராயாமல் செய்தி வெளியிட்டதற்காக இந்த நடவடிக்கை.
நாள் முழுக்க சும்மா நச்னு இருக்கு என்று இல்லாத பொல்லாத ஊர் வம்புகளை கூவி விற்கும் இவர்கள், அறிக்கையை ஆராயாமல் வெளியிட்டதற்கு வழக்கு தொடர்கிறார்களாம். ச்சும்மா 'நச்சு'னு இல்ல?
|
