ஹைதராபாத்தில் நிருபர்களை சந்தித்தவர், "வழக்கமாக ஒரு படம் வெளியானால் படம் நல்லாயிருக்கு என்பார்கள். தசாவதாரத்தைப் பொறுத்தவரை யாரிடம் கேட்டாலும், ரெண்டு தடவை பார்த்திட்டேன் என்கிறார்கள், இட்ஸ் அமேசிங்" என்றார் கமல்.
உண்மையிலேயே ஆச்சரியம்தான்! கமல் படங்களிலேயே வசூல் சாதனை என்றால் அது தசாவதாரம்தான். சென்னையில் மட்டும் முதல் மூன்று நாட்களில் 97 லட்சங்கள் வசூலித்தது தசாவதாரம். இருபத்தியொரு திரையரங்குகள்...நூற்றுக்கணக்கான காட்சிகள். நியாயமாக அடுத்து வந்த நாட்களில் வசூல் குறைய வேண்டும். ஆனால், அடுத்த ஏழு நாட்களில் இரண்டு கோடியை தாண்டியது சென்னை கலெக்ஷ்ன். பத்துநாள் முடிவில் சென்னையில் மட்டும் மூன்று கோடிக்குமேல் வசூலித்த முதல் தமிழ்ப்படம் என்ற பெருமையை பெற்றுள்ளது கமலின் இந்தப்படம்.
கேரளாவில் முன்னணி நடிகர்களின் படங்களை தசாவதாரம் பின்னுக்கு தள்ளியுள்ளது. அதேபோல் ஆந்திரா. மலேசியாவில் முதல் மூன்று நாட்களில் மட்டும் ஆறு லட்சம் டாலர்களுக்குமேல் குவித்துள்ளது. சென்றவார இறுதியில் U.K.யில் தசாவதாரத்தின் மொத்த வசூல் 1.8 கோடி! ஒரு திரையிடலுக்கான கலெக்ஷன் சதவீதத்தில் சர்க்கார்ராஜ் உள்ளிட்ட இந்திப் படங்களை பின்னுக்கு தள்ளி தொடர்ந்து தசாவதாரம் முதலிடத்தில் உள்ளது.
அதே போன்று அமெரிக்கவிலும் தென்னிந்திய மொழி சினிமா செய்திராத வசூல் சாதனையை கமல்படம் நிகழ்த்திக் கொண்டிருக்கிறது. குசேலன் வரும்வரை இந்த வசூல் கொண்டாட்டம் நிற்கப் போவதில்லை.
|
