"கேப்டனை வைத்து படம் இயக்குவதற்காக ஐந்து வருடங்களுக்கு முன் அவரிடம் கதை சொன்னேன். அப்போது கேப்டன் வேறு படங்களில் பிஸியாக இருந்தார். காலமும் நேரமும் இப்போதுதான் கூடி வந்திருக்கிறது" என்று கூறும் மாதேஷுக்கு ஐந்து வருடங்கள் காத்திருந்ததுக்கான வருத்தம் துளியில்லை. "'வித்தகன்' கேப்டனின் 150-வது படம். காத்திருந்ததால் எனக்கு கிடைத்த கவுரவம் இது" என்று அதற்கு காரணமும் கூறினார்.
படத்தில் போலீஸ் அதிகாரியாக வருகிறார் விஜயகாந்த். காக்கி சட்டை கேரக்டரை விஜயகாந்தை வைத்து வெவ்வேறு இயக்குனர்கள் சக்கையாக சாறு பிழிந்த பிறகும் போலீஸ் வேடமா?
"ஆனால், இந்த கேரக்டர் இதுவரை கேப்டன் நடித்த எல்லா போலீஸ் வேடத்திலிருந்தும் வித்தியாசப்பட்டிருக்கும்" என்று உறுதியாக கூறினார் மாதேஷ்.
கனடா, சீனா உள்ளிட்ட வெளிநாடுகளில் 'வித்தகன்' படப்பிடிப்பு நடைபெறுகிறது. அடுத்தமாதம் முழுக்க வெளிநாடுகளில்தான் இருக்கப் போகிறது இப்பட யூனிட். படத்தில் விஜயகாந்துக்கு பன்ச் வசனங்களுக்கு பஞ்சமில்லையாம். அதிலும் ஹைலைட் பன்ச் டயலாக் ஒன்று உள்ளது. அதை வெவ்வேறு தருணங்களில் வெவ்வேறு உச்சரிப்பில் விஜயகாந்த் சொல்லும்போது தியேட்டர் பிச்சுக்கும் என்றார் மாதேஷ். அந்த வசனம்,
"ஒரு தடவை ஜெயிச்சா பத்தாது. ஒவ்வொரு தடவையும் ஜெயிக்கணும்."
|
