அம்மா அர்ச்சனாவுக்கு செல்ல மகனாக அழகுசுந்தரம் பெயரில் திருநெல்வேலியில் உள்ள ஒரு கிராமத்தில் சூதுவாது தெரியாமல் சுற்றி திரிபவர் தனுஷ். நோய்வாய்ப்பட்டு கிடக்கும் அப்பா லிவிங்ஸ்டன் திடீரென்று செத்துபோக நிலைகுலைந்து போகின்றனர் அம்மாவும் மகனும்.

அர்ச்சனாவுக்கு பூவையும் பொட்டையும் அழித்து ஊர் பெரிசுகள் சடங்கு செய்யும்போது அம்மாவின் கண்ணாடி வளையல் உடைக்கப்பட அலறுகிறார் தனுஷ். அம்மாவுக்கு தங்க வளையல் வாங்கித்தரும் லட்சியத்தில் சென்னைக்கு வண்டி ஏறும் தனுஷ் வந்த இடத்தில் சந்திக்கும் பிரச்சனைகள்தான் கதை.

கிராமத்து அழகுசுந்தரம் தவிர ஏற்கனவே பார்த்து சலித்த தனுஷ்தான் பரட்டையாக இதிலும் பயமுறுத்துகிறார். சாது மிரண்டால் காடு கொள்ளாது என்பது உண்மைதான். ஆனாலும் கேப் வெடிக்கும் தீபாவளி துப்பாக்கியால் மிலிட்டரியையே காலி பண்ணுவது எப்படி கற்பனையாக தெரியுமே அப்படிதான் இருக்கிறது தனுஷின் திடீர் வெறியும் வேகமும்.

'குயிலை பிடிச்சு கூண்டிலடைச்சு கூவ சொல்கிற உலகம்...' என்றவரி மீரா ஜாஸ்மினுக்கு பொருத்தம் என்றால் அம்மாவாக வரும் அர்ச்சனா 'மயிலை பிடிச்சு காலை உடைச்சு ஆடசொல்கிற உலகம்' வரிக்கு பொருத்தமாகிறார். கிராமத்திலிருந்து நகரத்திற்கு டிரங்கு பெட்டிகளுடன் வரும் கேரக்டர்களை காமெடியாக பார்க்கும் இந்த காலத்தில் அர்ச்சனா துணிமணிகளை மூட்டை கட்டிக்கொண்டு வருவதுபோல் சித்தரிப்பதை நினைத்து சிரிப்பதா அழுவதா என்று தெரியவில்லை.

ஸ்டார் ஹோட்டல் 'குக்'கை அழைத்து வெந்நீர் போட்டுதரச்சொன்னதுபோல் ஆகிவிட்டது இயக்குனர் சுரேஷ் கிருஷ்ணாவின் நிலைமை.