வாழ்க்கையின் ஒவ்வொரு கணங்களையும் சந்தோஷ சாரலில் நனைத்தெடுப்பவர் இன்ஜீனியர் விநய். பேச்சு - செயல் எல்லாவற்றுக்கும் அளவுகோல் வைத்திருப்பவர் சதா. வெவ்வேறு தளத்தில் இருக்கும் இருவரும் காதல் என்ற கோட்டில் இணைகிறார்கள்.

அறிமுகமில்லாத பெண்களிடம்கூட போகிறபோக்கில் 'கடலை' போடும் ஜாலிக்கு சொந்தக்காரரான விநயின் பழக்கமே அவரது காதலுக்கு வில்லனாய் வந்து நிற்கிறது. சந்தர்ப்ப சூழ்நிலைகளெல்லாம் ஒன்றிணைந்து விநயை தவறான ஆளாகவே காட்ட, சதாவின் மனசில் சந்தேகம் பிறாண்ட ஆரம்பிக்கிறது. காலபோக்கில் இருவரின் காதலும் கண்ணாமூச்சி ஆட, இடையில் வந்து சேர்கிறார் இன்னொரு நாயகி தனிஷா. சதா விநயை வெறுக்க, தனிஷா ஒருதலையாய் காதலிக்க, வெற்றி பெறுவது எந்த காதல் என்பதை தித்திப்பான திரைக்கதையாக்கியிருக்கிறார் ஜீவா.

அப்பாஸ், மாதவன் வரிசையில் இன்னொரு சாக்லெட் ஹீரோவாக விநய். ஜாலியும் - சாதுர்யமும் கலந்த பேச்சு, சுட்டி குழந்தையின் துறுதுறுப்பு என படம் ஆரம்பித்த சொற்ப நிமிடங்களிலேயே மனசுக்குள் இடம்பிடித்து விடுகிறார்.

அட... சதாவா இது! வானம் பார்த்த பூமியாய் சமீபகாலமாக வறண்டு போயிருந்தவரின் தோற்றம் - நடிப்பில் 'சிம்லா' ஸ்பெஷல் ஜில்லிப்பு.

"பொண்ணுங்களும் சுவிங்கமும் ஒண்ணுதான். இரண்டுமே ஆரம்பத்தில் இனிப்பாகதான் இருக்கும்" மனசுக்குள் 'ஒட்டி'க் கொள்ளும் இதுபோன்று வசனங்களில் எஸ். ராமகிருஷ்ணனின் பேனா எதார்த்தம் நிரப்பியிருக்கிறது.

டமடம இசையில் கதையை வெறித்தோட செய்யாத ஹாரிஸ் ஜெயராஜின் இசைக்கு சபாஷ். 'ஜூன் போனால்....', 'வைகாசி நிலவே....' பாடல்களில் கவிஞர்களின் வரிகளுக்கும் பாடகர்களின் குரலுக்கும் இடம் கொடுத்திருப்பது சிறப்பு.

விநய் மாதிரியான காதலை பெறவேண்டும், சதா மாதிரியான காதலை புரிந்து திருந்த வேண்டும் என இருவேறு கோணங்களில் காதலர்களுக்கு அரிதான பரிசு கொடுக்கிறது ஜீவாவின் இயக்கம்.